عارفين الحب الصامت ده اللي هو الاتنين بيحبوا بعض بس كل واحد فيهم بيحاول يبين إنه مش شايف الطرف التاني ولا فارق معاه، الحب اللي هو بيتعمدوا فيه إنهم يضايقوا بعض ويستفزوا بعض، وكل واحد فيهم بيحاول يثبت إنه أقوى من التاني، بس الحقيقة إنه لو حصلت مواجهة بينهم الاتنين هينهاروا حرفيًا قصاد بعض.
الحب اللي هو بيتعمدوا فيه التجاهل والقسوة لمجرد إنهم يخفوا ضعفهم قدام بعض، لإنهم خايفين من التصريح.
الحب اللي بيكون عينهم على بعض بس يدور وشه بسرعة قبل ما الطرف التاني يلاحظ حاجة.
الحب بتاع متابعة المنشورات والحالات لأنهم عايزين يتواجدوا في حياة بعض، وكل واحد منهم بيحاول يطمن علي التاني وعامل إيه النهاردة.
الحب اللي هو: "أنا قوية وأقدر أقولك في وشك إني بحبك… بس مش هخليك تشوفني تاني بعدها وهختفي من حياتك."
الحب بتاع رفيع بيه العزايزي لما حب فرحة وكان قاسي جدًا عليها وبيتعمّد يضايقها رغم إنه بيعشقها.
ده الحب اللي أنا بحبه،
وده الحب اللي اتمنيته طول حياتي،
وده الحب اللي فجأة لقيت نفسي عايشاه.
بس الحقيقة؟ إن الحب ده على قد ما هو لذيذ وممتع للمتفرج، على قد ما هو مرهق جدًا للطرفين.
نوع صادق جدًا من انواع الحب بس معقد ومتناقض، حب كله كبرياء وخوف واحتياج مكتوم. النوع ده من الحب بيبقى فيه مشاعر كبيرة بتتخبّى ورا تصرفات عكسها تمامًا… تجاهل، قسوة، تحدي… لكن تحت السطح فيه لهفة، وخوف من الرفض، واحتياج عميق للاحتواء والغياب فيه احتياج كبير مش قادر ياخد شكله الطبيعي.
حب جميل جدًا على الورق… وفي الخيال… بس في الحقيقة، هو اختبار صعب للروح، بيخلي القلب دايمًا في حالة تأهب… ما بين أمل ووجع، وما بين "أنا بحبك، بس مش هقول."