الاستحقاق ببساطة هو إحساسك الداخلي إنك تستاهل الخير، الحب، النجاح، وكل الحاجات الحلوة في حياتك. الإحساس ده ملوش علاقة بإنجازاتك أو رأي الناس فيك، ده شعور جواك أنت لوحدك. بس كتير مننا للأسف بيحس إنه "مش كفاية" أو "مايستحقش". طب ليه؟
أسباب عدم الشعور بالاستحقاق!
أولا /الطريقة اللي اتربينا عليها:
لما تكون صغير وتسمع كلام زي: "انت مش نافع " أو "إنت مش شاطر زي فلان"، ده بيزرع جواك شك في نفسك ،والمقارنات المستمرة بينك وبين أي حد بتخليك تحس إنك دايمًا أقل.
ثانيا /تجارب الحياة:
لما تجرب مرة واتنين وتفشل، ده ساعات بيخليك تفكر إن النجاح مش ليك ، وكمان العلاقات الفاشلة اللي دخلتها أو الغلطات اللي عملتها زمان ممكن تأثر عليك بشكل كبير.
ثالثا / الناس اللي حواليك:
لو في حد حواليك بيقلل منك أو كلامه سلبي طول الوقت، طبيعي تحس إنك قليل ، لما تحس إن حب الناس ليك أو تقبلهم ليك مربوط بحاجات معينة بتعملها، زي الشغل أو الدراسة، هتبدأ تشك في استحقاقك.
رابعا /تفكيرك الداخلي:
عقلك الباطن دايمًا بيسجل كل حاجة، ولو مليان أفكار سلبية، طبيعي تشوف نفسك أقل ، إحساسك بالذنب أو الخجل من حاجة حصلت في الماضي بيقلل إحساسك إنك تستاهل الخير.
إزاي أرفع إحساسي بالاستحقاق؟
إنك تقبل نفسك زي ما أنت وبطل تحاول تكون نسخة من حد تاني. الكمال مش موجود، وأنت بكل عيوبك مميز وفريد.
اشتغل على نفسك وطورها بإستمرار لأن جزء كبير من إحساسك بالاستحقاق مرتبط بشغلك على نفسك. مش معناه إنك لازم تبقى مثالي، لكن إنك تحاول تكون أفضل من نفسك اللي فاتت. التطوير ده بيبدأ بخطوات صغيرة لكنها مهمة:
اكتشف نفسك ، اسأل نفسك عن شغفك، نقاط قوتك، وضعفك. كل ما تفهم نفسك أكتر، كل ما تقدر تطورها، مش لازم تطور نفسك في مجال معين علشان تعجب اللي حواليك، طور نفسك ف الحاجة اللي بتحبها وحاسس نفسك ممكن تنجح فيها.
إنك تتعلم حاجة جديدة، كل يوم ممكن تضيف لنفسك حاجة، سواء قراءة كتاب، تعلم مهارة، أو حتى تجرب فكرة جديدة.
إنك تعتني بصحتك الجسدية والنفسية لما تهتم بنفسك، بتحس إنك تستحق حياة أفضل.
قيم نفسك بالإنجازات، مش الإخفاقات، ركز على الحاجات اللي عملتها وافتخر بيها، مهما كانت بسيطة.
واجه مخاوفك واتعلم من تجاربك ، كل ما تواجه خوف أو صعوبة، بتثبت لنفسك إنك أقوى، وده بيزود إحساسك بالثقة والاستحقاق.
غير الطريقة اللي بتكلم بيها نفسك، خد بالك من الكلام اللي بتقوله لنفسك بدل ما تقول "مش بعرف" قول "هتعلم" ، كون لطيف مع نفسك، وكأنك بتكلم صاحبك المقرب.
سامح نفسك على اللي فات، الماضي مش نهاية العالم، هو جزء منك، بس مايعرفش يحدد مستقبلك. سامح نفسك وابدأ صفحة جديدة.
حط حدود بينك وبين الناس "حدود صحية". متعملش حاجة علشان ترضيهم علي حساب نفسك وقول لأ وقت ما تحتاج تقولها، بطل تخلي الناس يستغلوك أو يقللوا منك ، لما تقول "لأ"، ده مش معناه إنك قليل، بالعكس ده احترام لنفسك.
قرب من ربنا، القرب من ربنا بيدي إحساس بالسلام الداخلي، وبيعلمك إنك تستحق كل الخير اللي ربنا كاتبه ليك وخلي عندك يقين إنك لما تسعى، ربنا هيعوضك بأكتر مما تتمنى ، يعني أهم حاجة تسعي وتتوكل علي الله.
الخلاصة
الاستحقاق مش حاجة حد هيدهالك ، لكن هو إحساس أنت اللي تزرعه جوا نفسك. لما تبدأ تشتغل على نفسك، تطور مهاراتك، وتصدق إنك تستحق الخير، الدنيا هتبدأ تديك الخير.
ابدأ النهارده واسأل نفسك: "إيه الحاجة اللي ممكن أعملها عشان أكون أفضل وأستحق الخير؟" وابدأ خطوة خطوة.