لما احتاجت ليك!

اللي عاشت لوحدها سنين من غير أب ولا أم ولا إخوات، مش ممكن تبقى محتاجة لسند راجل.
واللي عاشت أربع سنين مع شخص نرجسي، وكأنه شيطان ماشي على الأرض، وصلها للموت الحقيقي، وقدرت تخلص منه، أكيد مش محتاجة لسند راجل.
اللي خسرت شغلها وفلوسها، واتفاجئت بمسؤولية عيلين في رقبتها، وداقت معنى الجوع والاحتياج، وقدرت لوحدها تقف على رجليها تاني، مستحيل تكون محتاجة لسند راجل.
اللي ولدت مرتين قيصري، وفي المرتين كانت لوحدها، بتتسند على الحيطان عشان تقوم وتتحرك، وتمشي رغم الألم… أكيد مش محتاجة لسند راجل.
اللي قدرت تحافظ على نفسها وعفتها، رغم إنها ست مكتملة الأنوثة ومفيش حد ضحك عليها ولا عرف يستغلها… دي أكيد مش محتاجة لسند راجل.
واللي داقت الخذلان من أقرب الناس، وسهرت تبكي لحد الصبح من غير ما حد يسمعها، ومسحت دموعها بإيديها… دي أكيد مش محتاجة لسند راجل.

بس لما احتاجت ليك إنت، كان لأنها بتحبك.
لأنها حست إنك جزء من روحها.
لأنها متأكدة إنك إنت كمان عانيت وتعبت زيها.
لما احتاجت لوجودك، هي ما كانتش محتاجة لشخصك ولا لفلوسك، ولا لإيديك علشان تطبطب،
هي بس كانت محتاجة لروحك.
محتاجة تشوف نفسها في لمعة عنيك وانت بتبصلها.
محتاجة لحنية صوتك وهو بيطمن عليها.

حب نقي طالع من الطفلة اللي لسه عايشة جواها…
حب بييجي بعد ما الإنسان يمر بكل أشكال الانكسار والتجارب اللي ممكن تقتله من جوه.
حب مش مبني على حاجة غير الروح.
لما احتاجت ليك، كان لأنها حبت نفسها منك… وحبتك إنت، لأنها عارفة إنك منها.

لعلها تصل لمن يفهم.