بيني وبين روحي

عارف أغنية أم كلثوم إللي بتقول فيها:
"خاصمتك بيني وبين روحي، وصالحتك تاني،
وخدت عتابك على قلبي، وخصامك كان هواني!"

حاجة كده بتعبّر عن الحب من طرف واحد،
وإن الطرف الواحد ده عايش قصة الحب مع حبيبه في خياله لوحده ...
دي مش مجرد أغنية، دي حكاية ناس كتير...
اللي بيحبوا في السر، وبيعيشوا القصة لوحدهم،
اللي لما يشتاقوا، يسكتوا،
ولما يزعلوا، يواسوا نفسهم،
ولما يتمنوا حضن، يحضنوا الخيال

ومش هنكر إني واحدة من الناس دول ... متستغربش أنا فعلا واحدة منهم
آيوه أنا بحبك من بعيد،
وبكلمك في بالي،
وبزعل منك وأنا عارفة إنك يمكن مش واخد بالك حتى إني موجودة...
بس بحبك ! ،
بعيش تفاصيلك كل يوم،
بفرحلك لو شفتك مبسوط،
وبتوجع لو حسيتك زعلان،
رغم إنك عمرك ما حاسيت بالكلام ده ولا عمرك هتفهمه

أنا اللي خاصمتك في صمتي،
وصالحتك وأنا لوحدي،

يمكن بتقول لنفسك ده مش حب! ،
بس في نظري…
حب .. حب صادق.. حب نضيف. حب كبير اكبر من خيالك لما تسرح وانت قاعد لوحدك وباصص للسما
أكبر من تمثيلك وإنت بتحاول توصل للناس إنك سعيد في حياتك ،
آيوه حبي ليك ده فعلا حب وإن كان من طرف واحد،
بس الطرف ده بيحب بجد.